ሰራዊት ትግራይ ዘብዒን ዋሕስን ህዝቢ ትግራይ እዩ!!!

ሰራዊት ትግራይ ዘብዒን ዋሕስን ህዝቢ ትግራይ እዩ!!!

ህዝቢ ትግራይ፣ ፌደራል መንግስቲ ኢትዮጵያ ምስ ናይ ወፃእ ወረርቲ ሓይልታት ተላፊኑ ኣብ ልዕሊኡ ንዝኸፈቶ ናይ ፅንተት ወራር ብኽቡር መስዋእትነቱ መኪቱ ፣ ነቶም ደመኛታት ፀላእቱ ኣገዲዱ ናብ ሰደቃ ሰላም ንኽመፁ ብምግባር ግሁድ ዝገበሮ ውዕል ፕሪቶሪያ ተግባራዊ ንኽኸውን ንዝሓልፉ ክልተ ዓመታት ብትዕግስቲን ፀዋራይነትን እኳ እንተተፀበየ፣ ብሰንኪ ሽርሒን ምስሉይነትን ፌደራል መንግስቲ ኢትዮጵያን ሸለልትነትን ዋሕዲ ቆራፅነትን ስሑት ኣጀንዳን መራሕቲ ትግራይ ፣ ውዕል ፕሪቶሪያ ተወንዚፉ ብመሰረት እቲ ውዕል ክምለስ ዝግብኦ ሉኣላዊ መሬት ትግራይ እተይተመልሰን ዝተመዛበለ ህዝብና ናብ መረበቱ እንተይኣትወን እነሆ ኣብ መከራን ፀበባን ይርከብ ኣሎ።

እዞም ብሰንኪ ወዕል ፕሪቶሪያ ብምሉእነት ዘይምትግባሩ ዝተወለዱ ማሕበራዊ፣ ፖለቲካዊን ኢኮኖሚያዊን ፀገማት ኣብ ልዕሊ ህዝብና ህዝቢ ትግራይ ዘውረድዎ ቅልውላው ተበሊፆም ደመኛታት ፀላእቲ ህዝቢ ትግራይን ተለኣእኽቶምን ሓድነት ህዝቢ ትግራይ ብምዝራግ ኣቢሎም፣ ህዝቢ ትግራይ ንምድኻምን ንምብታንን ብዙሕ ፃዕሪ ገይሮም እዮም። ብኣንፃሩ ፈተውቲ ህዝቦም ዝኾኑ ወገናት ድማ እቲ ፀገም ብኣግኡ ንኽፍታሕን ውዕል ፕሪቶሪያ ብምሉእነት ንኽትግበርን ሓላፍነት ዝተዋህቦም መራሕቲ ትግራይ ዘድሊ ዘበለ ፀቕጢ ንኽገብሩ ተደጋጋሚ ፃዊዒትን ምሕፅንታን እናገብሩ መፂኦም እዮም።

ካብ ሞንጎ እቶም ውዕል ፕሪቶሪያ ብምሉእነት ንኽትግበርን ህዝቢ ትግራይ ብቕልጡፍ ናብ ንቡር ናብርኡ ንኽምለስን ኣብ ዝግበር ዝነበረ ፃዕሪ እናተሳተፉ ዝፀንሑ ወገናት፣ ብዝለዓለ ትዕግስትን ውሕሉል ኣተሓሕዛን እናካየዶ ብዝፀንሐ ዘይሕለል ፃዕሪ ሰራዊት ትግራይ ብቐዳምነት ዝስራዕ እዩ። ሰራዊት ትግራይ እቲ ኣብ ፖለቲካ ትግራይ ዝነበረ ሕቱኽቱኽ ካብ ቁፅፅር ንኸይወፅእን ብሰላማዊ መንገዲ ንኽፍታሕን፣ ኣብ ኣኼባታት እናተሳተፈ ብምኽርን ማዕዳን እናገበሮ ንዝመፀ ፃዕሪ ብኣድናቖት እናተዓዘብናዮ መፂእና ኢና። ኮይኑ ግና እቲ ዝተገብረ ፃዕሪ ኹሉ፣ ፍልፍል ኩሉ ፀገማት ህዝቢ ትግራይ ዝኾነ ኢተግባራዊነት ውዕል ፕሪቶሪያ ብምሉእነትን ንኽትግበር ዘኽእል ኩነታት እንተይተፈጥረ ፀኒሑ እዩ።

እዞም ንኽልተ ዓመታት እናንከላለው ዝመፁ፣ ብሰንኪ ዘይምትግባር ውዕል ፕሪቶሪያ ዝተፈጥሩ ፀገማት እዚኦም ንምፍታሕ ፣ እቲ እንኮ እሙንን፣ ዘብዒን ዋሕስን ህልውና ህዝቢ ትግራይ ዝኾነ ሰራዊት ትግራይ ወሲድዎ ዘሎ ቅዋም ኣዝዩ ዝነኣድን ዘተኣማምንን ኮይኑ ረኺብናዮ ኣለና። ሰራዊት ትግራይ ደሙን ህይወቱን ኸፊሉ ህልውንኡ ዘረጋገፀሉ ህዝቢ ትግራይ ካብዝኣተዎ ቅልውላው ብዘላቒነት ንምውፃእ እናገበሮ ንዝመፀ ፃዕርታት እናመስገንና፣ ሎሚ ድማ ኣብ ጥሪ 15 2017 ንዘውፅኦ መግለፂን ዘሕለፎም ውሳነታትን ዘለና ዝለዓለ ኣድናቖትን ምሉእ ደገፍን ንገልፅ። ብቐፃሊ እውን ሰራዊት ትግራይ ደሕንነትን ህልውናን ህዝቢ ትግራይ ንምርግጋፅ ኣብ ዝገብሮ ንጥፈታት ኩሉ ኣብ ጎኑ ከምእንስለፍ ነረጋግፅ።

እዚ ተጀሚሩ ዘሎ ኣወንታዊ ፃዕርታት እዚ ተፈፃሚ ንኽኾን ናይ ኩሉ ትግራዋይ ተሳትፎን ደገፍን ዝሓትት ስለዝኸውን፣ ካብ ምትግባር ውዕል ፕሪቶሪያ ንታሕቲ ዘሎ ኣፈላላያት ኩሉ ኣብ ጎኒ ብምቕማጥ፣ ኩሉ ትግራዋይ ንምሉእ ተግባራዊነት ውዕል ፕሪቶሪያ ኣብ ጎኒ ህዝቢ ትግራይ ንኽዓስል ፃዊዒትና ነቕርብ።
ክብርን ሞገስን ነቲ ኣብ ጉዳይ ህዝቢ ትግራይ ትኽስ ዘይብል ሰራዊት ትግራይ!!!

ዘለኣለማዊ ክብርን ሞገስን ሰማእታትና!!!

ማሕበር ተጋሩ ሰሜን ኣሜሪካ (ማተሰኣ)
ዋሽንግቶን ዲሲ
ጥሪ 15 2017