ETHIOPIAN PRESS AGENCY URGED TO EXPEDITE ITS RESTRUCTURING PROCESS

EPA

ድርጅቱ የኮርፖሬት አደረጃጀት ሂደቱን ማፋጠን እንዳለበት ተገለጸ
መርድ ክፍሉ

አዲስ አበባ፡- የኢትዮጵያ ፕሬስ ድርጅት ወደ ኮርፖሬት አደረጃጀት ለመለወጥ የሚያደርገውን እንቅስቃሴ አጠናክሮ መቀጠልና ማፋጠን እንዳለበት በህዝብ ተወካዮች ምክር ቤት የባህል፣ ቱሪዝምና መገናኛ ብዙኃን ጉዳዮች ቋሚ ኮሚቴ ገለፀ። የህትመት ስርጭቶች ላይም ትኩረት እንዲሰጥ ተጠይቋል።
ቋሚ ኮሚቴው ትናንት የድርጅቱን የ2008 ዓ.ም በጀት ዓመት ዕቅድና የአንደኛ ሩብ ዓመት አፈፃፀም ገምግሟል። የቋሚ ኮሚቴው ሰብሳቢ ወይዘሮ ፈትያ የሱፍ፤ ድርጅቱ የተጣለበትን ኃላፊነት እንዲወጣና ያስቀመጠውን ግብ ለማሳካት ወደ ኮርፖሬት አደረጃጀት ለመለወጥ የሚያደ ርገውን እንቅስቃሴ አጠናክሮ መቀጠል እንዳለበት አመልክተዋል።
ድርጅቱ ቀደም ብሎ የኮርፖሬት አደረጃጀት እንቅስቃሴ መጀመሩን ያስታወሱት ሰብሳቢዋ፤ ሁለተኛው የዕድገትና ትራንስፎርሜሽን እቅድ ዘመን የኮርፖሬት አደረጃጀት ለውጥ ላይ ትኩረት መስጠት እንዳለበት ጠቁመዋል።

ቋሚ ኮሚቴው፤ ድርጅቱ የሚያሳትማቸው የህትመት ውጤቶች ተደራሽነት ላይ ትኩረት ተሰጥቶ መሰራት እንዳለበት አስገንዝቧል። የህትመት ውጤቶቹ በሁሉም የክልል ከተሞች የሚዳረሱበት ሁኔታዎች መመቻቸት እንዳለበት አሳስቧል።
የድርጅቱ ሥራ አስኪያጅ አቶ ሰብስቤ ከበደ በበኩላቸው፤ ድርጅቱ የተጣለበትን ኃላፊነት ለመወጣት እንቅስቃሴ እያደረገ እንደሚገኝና ከዚህም ውስጥ ወደ ኮርፖሬት አደረጃጀት ለማደግ የተጀመረው ሥራ ተጠቃሽ መሆኑን አስረድተዋል።

በቀጣይ በድርጅቱ ውስጥ ያሉትን ችግሮች ለመፍታት የሚያስችሉ ሥራዎች በዕቅድ መያዛቸውን የጠቀሱት ሥራ አስኪያጁ፤ በቅጥር፣ በደረጃ ዕድገት እንዲሁም ሌሎች የመልካም አስተዳደር ችግሮች እየተፈቱ እንደሚገኙ አመልክተዋል።

የድርጅቱ ምክትል ሥራ አስኪያጅ አቶ መብራህቶም ኪሮስ እንዳሉት፤ ቀደም ብለው የነበሩ በግዥ ላይ፣ በነዳጅ አጠቃቀምና በጥገና ላይ ይስተዋሉ የነበሩ ችግሮች ተፈተዋል። ከሠራተኛው ይቀርቡ የነበሩ ቅሬታዎችም በየሦስት ወሩ በሚደረግ መድረክ ውይይት ይደረግባቸዋል ብለዋል።
በተቋሙ ያለው ሥራ ሁሉም ሠራተኛ የተሳተፈበት እንዲሆን በየደረጃው መድረኮች በማዘጋጀት ውይይት ይደረግበታል ያሉት አቶ መብራህቶም፣ በአንድ ለአምስት አደረጃጀት በማጠናከር የተቋሙን ሥራዎች ይበልጥ ለማሻሻል እንደሚሰራም አመልክተዋል።

Leave a Reply